【讀者C 來稿】
我有一個深藍嘅警察朋友，我係深黃，但係呢五個月以嚟，我地感情都冇變，依然係好朋友。
作為深黃，一直都聽到好多身邊嘅人話警察冇一個係無辜，通常我都唔出聲，雖然我唔認同，但係我理解，理解佢地點解咁嬲。
有時，我地各自出去行動，都好驚會喺衝突現場碰面。
好記得有一晚我食椒，佢雖然喺同一個地區，不過就同我隔住成條街嘅距離。中完椒第二朝起身，我send條片俾佢睇：「喂琴晚我中得好應呀。」，佢就會話：「好彩冇親眼現場睇住，如果睇住你俾人噴，我會好難受。」
今日，我見到網上傳緊一段話前線警察開始因為放得多tg而有皮膚問題，我提示吓佢出去現場要小心啲，唔好行咁前咁近啲煙。點知佢話佢由六月開始皮膚已經有反應，我當下其實好擔心，佢係個好易敏感嘅人，加埋tg，佢啲皮膚一定頂唔順。
有時候，或者大家都需要停一停，諗一諗自己係咪已經變成左自己最唔想成為嘅人。
我唔係想為警察洗白，亦都覺得冇呢個洗白嘅必要，因為以我認識嘅佢，即使同我立場唔同，有時傾計會傾到好累，但至少，我地仍然尊重彼此嘅意見，冇因為政見而割蓆。
呢個社會真正需要嘅，係高官同市民嘅互相理解，政治問題，就請政治解決。示威者係人，警察都係人，每個人生而來應該受到平等嘅對待，而呢種平等，唔應該係有制服定冇制服嘅分別。
有權力嘅人，執法嘅人，你地應該用你地擁有嘅力量去保護人，而唔係欺壓人。
