今日（15日）為在金鐘太古廣場外墮樓的男子梁凌杰先生逝世一週年。昨日（14日），其家父用錄音投稿「蘋果日報」，表示自己與其家人在過去一年過得絕不容易，亦承受各個方面的壓力，但對兒子的思念也沒有半點減退，並一直為兒子的崇高理念而自豪，更表明希望就兒子的離世展開死因研訊，以得知兒子墮樓當天，是否遇過任何不公義的冷待，為他取回公道。
梁父同時寄語年輕人好好保護自己，其稱，黎明前是最黑暗的，但相信以港人的能耐，「我哋會搵到出路，再難捱都堅持捱落去」。他在錄音最後說，很感謝年輕人為香港爭取民主、人權、自由、法治，「願榮光歸香港。願主保祐。」
以下為梁父的錄音全文（引述蘋果日報報導）：「
2019年6月15日，係我屋企人、同香港、同好多人感到十分傷心嘅一天。
我哋從不同媒體都知道大家無忘記我個仔，心情十分複雜。
過去一年，呢一年發生好多事，亦改變好多人。呢一年我哋屋企人過得唔容易，受到唔同嘅壓力。
每一日我哋都嘗試找安穩、平靜嘅生活，而家總算安好，同埋接受杰仔嘅離開……
但係我都……為香港、同所有香港人一樣，
唔能夠擁有免於恐懼（嘅）自由，感到悲痛悲哀。
杰仔離開，但我哋作為人父母，思念一啲都無減退，同時為佢嘅崇高理念而自豪。
呢一年，每個香港人都應該同我哋（一樣）過得唔容易。
但呢個政權越來越腐敗，
我相信好多香港人對呢個政權不抱任何希望。
我同屋企人見到好多年輕人喺呢一年裏面，同杰仔一樣抱住單純的理念走出嚟，
但係不停受到打壓，甚至受傷、流血、犧牲。
我哋為人父母，睇住啲年輕人，感到好心痛同擔心，
亦唔希望更多年輕人好似杰仔一樣，為呢個無希望嘅政權而受傷。
我哋同一年前一樣，希望年輕人好好保護自己，留住有用嘅身軀，行得更遠，
嚟緊一年會更加黑暗，唔可以再同佢硬碰，否則只會悲劇再重演，
黎明（前）係最黑暗嘅，但我哋相信以香港人嘅能耐，我哋會搵到出路，再難捱都堅持捱落去。
杰仔嘅離去，我哋仍然希望為佢取回一個公道。
死者已矣，我哋家庭亦唔會完整，
我哋只係希望十分簡單，希望知道杰仔當天有無得到應有嘅協助，有無遇到不公平、不公義、不為人知嘅冷待，正如呢一年警方冷待對我哋一樣。
我哋希望有個死因研訊要求。
面對政權百般阻撓，我哋束手無策，但我哋唔會放棄，
亦將事件交畀律師處理，由律師繼續爭取。
我哋想講好多嘢，但可以講說話嘅空間十分有限，
我將呢件事全程交律師處理，
任何問題，會交畀律師代我哋回答。
最後，好感謝香港年輕人為香港爭取民主、人權、自由、法治，而犧牲，而努力。
願榮光歸香港。願主保祐。」
記者：饅頭
—————————————————————
香城公民媒體
Hong Kong Citizen Media
https://hkcitizenmedia.com/
